आज जलद ताप व किटकशास्त्रीय सर्वेक्षण मोहीम
धाराशिव दि.२६ (प्रतिनिधी) - जिल्ह्यामध्ये आजपर्यंत १० ठिकाणी किटकजन्य आजाराचा उद्रेक झाला आहे. त्यामुळे संपूर्ण जिल्ह्यातील सर्व गावांमध्ये २७ सप्टेंबर रोजी एक दिवशीय जलद ताप सर्वेक्षण व किटकशास्त्रीय सर्वेक्षण मोहीम राबविण्यात येणार आहे.
या मोहिमेचे संनियंत्रण जिल्हास्तरावरुन केले जाणार आहे. या मोहिमेचे नोडल अधिकारी म्हणून वैद्यकीय अधीक्षक व तालुका आरोग्य अधिकारी हे काम पाहणार आहेत. जिल्ह्यातील ग्रामीण व शहरी भागामधील गावांमध्ये मोहिमेचे नियोजन करण्यात आले आहे. या कालावधीमध्ये ग्रामीण भागातील प्रत्येक गावांतील २० घरांचे व शहरी भागामध्ये १०० घरांचे किटकशास्त्रीय सर्वे व ताप सर्वे करण्यात येणार आहे. या सर्वेक्षणात वैद्यकीय अधिकारी, सामुदाय आरोग्य अधिकारी, आरबीएसके आरोग्य कर्मचारी गट प्रवर्तक, आशा स्वंयसेविका व तालुका कार्यालयातील आरोग्य सहाय्यक यांच्या सहभागाने सर्वेक्षण करण्यात येणार आहे.
ज्या भागामध्ये सर्वेक्षण दरम्यान तापाचे रुग्ण व डास अळी वाढ आढळून आलेल्या कार्यक्षेत्रात प्रतिबंधात्मक कोरडा दिवस पाळणे, अबेट कार्यवाही करणे व आवश्यकतेनुसार ग्रामपंचायतमार्फत धूर फवारणी करण्याचे नियोजन आहे. तसेच नागरिकांना व शाळेतील विद्यार्थ्यांना किटकजन्य आजाराबाबतचे आरोग्य शिक्षण व जनजागृती कार्यक्षेत्रातील आरोग्य कर्मचारी व आशामार्फत करण्यात येणार आहे. तसेच २ ऑक्टोबर रोजी ग्रामसभेमध्ये सर्व ग्रामस्थांना किटकाचा प्रतिबंध करण्यासाठी गटारी वाहत्या करणे, टायर व ट्युब, अडगळीचे सामान रीकामे करणे, शौचालयांच्या व्हेंट पाईपला जाळी बसविणे व डासांपासून बचावासाठी रासायनिक क्वाईल व लिक्वीडचा वापर करणे आदी बाबींची माहिती देण्याबाबत सूचना दिल्या आहेत. तसेच डेंग्यु, चिकुनगुनिया व मलेरिया या आजार पसरविणाऱ्या डासांबाबत तसेच आजाराबाबत माहिती आरोग्य कर्मचारी व आशामार्फत माहिती देण्याच्या सूचना देण्यात आल्या आहेत. त्यामुळे याप्रमाणे कार्यवाही करुन किटकजन्य आजाराचे प्रतिबंध करण्याचे ध्येय मोहिमेच्या माध्यमांतून साध्य करण्यात येणार असल्याची माहिती जिल्हा हिवताप अधिकारी डॉ.मेंढेकर यांनी दिली आहे.
