तुळजाभवानी मंदिरासाठी १३८५ कोटी मंजूर तुळजापूर, उमरगा, नळदुर्ग रस्त्यांसाठी ३६७ कोटीजिल्ह्याच्या अर्थकारणाला बळकटी दिल्याबद्दल शिंदे-फडणवीस-पवार सरकारचे आमदार राणाजगजितसिंह पाटील यांनी मानले आभार
तुळजापूर, उमरगा, नळदुर्ग रस्त्यांसाठी ३६७ कोटी
जिल्ह्याच्या अर्थकारणाला बळकटी दिल्याबद्दल शिंदे-फडणवीस-पवार सरकारचे आमदार राणाजगजितसिंह पाटील यांनी मानले आभार
महाराष्ट्राची कुलस्वामिनी तुळजाभवानी देवी मंदिराच्या विकासाठी तब्बल एक हजार ३८५ कोटी रुपयांचा निधी मंजूर करण्यात आला आहे. त्यातून मंदिरातील एकूण २८ कामे हाती घेण्यात येणार आहेत. याव्यतिरिक्त जिल्ह्यातील तुळजापूर, नळदुर्ग आणि उमरगा येथील रस्ते विकासासाठी ३६७ कोटी रुपयांना मंजुरी देण्यात आली आहे. तेर, जागजी, माणकेश्वर तिर्थक्षेत्रासाठी ४६ कोटी रुपयांचा निधी मंजूर केला आहे. छत्रपती संभाजीनगर येथे झालेल्या मंत्रिमंडळाच्या बैठकीत शनिवारी धाराशिव जिल्ह्याच्या पदरात भरभरून निधी दिल्याबद्दल महायुती सरकारचे आमदार राणाजगजितसिंह पाटील यांनी आभार मानले आहेत.
सात वर्षाच्या कालखंडानंतर मराठवाडा मुक्तीसंग्रामाच्या अमृतमहोत्सवी वर्षाचे औचित्य साधून छत्रपती संभाजी नगर येथे राज्याच्या मंत्रिमंडळ बैठकीचे शनिवारी आयोजन करण्यात आले होते. प्रारंभी उस्मानाबाद आणि औरंगाबाद ही दोन्ही नावे वगळून धाराशिव आणि छत्रपती संभाजी नगर या नावाच्या फलकाचे अनावरण मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांच्या हस्ते करण्यात आले. त्यानंतर जिल्ह्यातील प्रमुख शासकीय कार्यालयांनीही दिवसभरात उस्मानाबाद नाव पुसून त्याठिकाणी धाराशिव करून नव्या अध्यायाचे साक्षीदार झाले.
कुलस्वामिनी तुळजाभवानी देवी मंदिर आणि परिसरातील २८ कामांसाठी आराखडा यापूर्वीच आ पाटील यांच्या पाठपुराव्याने तयार करण्यात आला होता. १६ जून रोजी उपमुख्यमंत्री देवेंद्र फडणवीस हे कृष्णा मराठवाडा सिंचन प्रकल्पाच्या यंत्र पूजन कार्यक्रमासाठी आले असता त्यांनी त्यावेळीच या विकास आराखड्यासह प्रस्तावित वैद्यकीय महाविद्यालयाच्या जागेची पाहणी करून त्याला हिरवा कंदील दाखविला होता.
त्यानुसार नवीन महाद्वार, मंदिरातील सभामंडप, रामदरा तलावाजवळ १०५ फूट उंचीचे तुळजाभवानी देवीचे शिल्प, लाईट आणि साऊंड शो, वाहनतळ आशा महत्वाच्या कामांचा यात समावेश करण्यात आला आहे. याव्यतिरिक्त तुळजापूर, नळदुर्ग आणि उमरगा तालुक्यातील रस्त्यांसाठी ३६७ कोटी रुपयांची मंजुरी देण्यात आली आहे. तेर येथील संतश्रेष्ठ गोरोबा कुंभार यांचे मंदिर व अन्य पुरातन स्थळांच्या विकासासाठी २० कोटी रुपये, माणकेश्वर येथील हेमाडपंथी मंदिराच्या विकासासाठी ११ कोटी आणि जागजी येथील महालक्ष्मी मंदिरासाठी १५ कोटी रुपयांचा निधी मंजूर केला आहे. तुळजापूर तालुक्यात शेळी समूह योजना राबविण्यासाठी १० कोटी रुपयांच्या निधीला मंजुरी देण्यात आली असल्याचेही आमदार राणाजगजितसिंह पाटील यांनी सांगितले.
शासकीय वैद्यकीय महाविद्यालयाच्या जागेचा निर्णय
धाराशिव येथील अनेक वर्षांपासून रखडलेला शासकीय वैद्यकीय महाविद्यालयाच्या जागेचा प्रश्नही या बैठकीत निकाली निघाला आहे. सोलापूर - धुळे राष्ट्रीय महामार्गावरील शासकीय तंत्रनिकेतनची जागा वैद्यकीय महाविद्यालयास देण्याचा निर्णय शनिवारी झालेल्या मंत्रिमंडळाच्या बैठकीत घेण्यात आला आहे. त्यासाठी आपण सातत्याने पाठपुरावा केला असल्याचे सांगून आमदार पाटील यांनी लातूर-बार्शी-टेंभुर्णी या महामार्गाच्या चौपदरीकरणासही बैठकीत मंजुरी देण्यात आली असल्याचे सांगितले आहे.
मराठवाडा मुक्ती संग्राम अमृत महोत्सवी वर्षानिमीत्त राज्य सरकारने धाराशिव व छत्रपती संभाजीनगर नामकरणाचे राजपत्र प्रकाशित केल्याबद्दल महायुती सरकारचे मनःपूर्वक धन्यवाद ! मागील अनेक वर्षांपासून मराठवाड्यातील जनतेची ही मागणी होती.
मराठवाड्याच्या सर्वंकष विकासाचा विचार करून आजच्या मंत्रिमंडळ बैठकीमध्ये रुपये ५९ हजार कोटी मंजूर करण्यात आले आहेत. धाराशिवच्या अर्थकारणाला नवी दिशा देणाऱ्या तुळजापूर विकास आराखडयासाठी रुपये १३२८ कोटी जाहीर करण्यात आले असून जिल्हावासियांसाठी अत्यंत महत्त्वपूर्ण असलेल्या शासकीय वैद्यकीय महाविद्यालयाच्या जागेचा विषय मार्गी लावण्यात आला आहे. दळणवळणाच्या दृष्टीने महत्वपूर्ण लातूर-बार्शी-टेंभुर्णी मार्गाचे चौपदरीकरण, तुळजापूर तालुक्यात शेळी समुह योजना राबविणे यासह मराठवाड्यातील सिंचन, कृषी, पायाभूत सुविधा, पर्यटन या क्षेत्रात विकास कामांसाठी भरीव निधी देण्यात आला आहे. तर कृष्णा मराठवाडा सिंचन प्रकल्प, सोलापूर - धाराशिव - तुळजापूर रेल्वे, १० हजार रोजगार निर्मितीची क्षमता असलेल्या तांत्रिक वस्त्रनिर्मिती यासारख्या अनेक महत्त्वपूर्ण प्रकल्पांसाठी यापूर्वीच निधी मंजूर करण्यात आला असल्याचे त्यांनी सांगितले.
