महाराष्ट्र राज्य उत्कृष्ट सार्वजनिक गणेशोत्सव मंडळाचा प्रथम अकोला जिल्ह्यातील श्री खंडेश्वर सार्वजनिक गणेश मंडळास तर द्वितीय सांगली जिल्ह्यातील विटा येथील तिरंगा गणेशोत्सव मंडळास जाहीर सांस्कृतिक कार्य मंत्री सुधीर मुनगंटीवार यांच्या हस्ते गुरुवारी पारितोषिक वितरण
महाराष्ट्र राज्य उत्कृष्ट सार्वजनिक गणेशोत्सव मंडळाचा प्रथम अकोला जिल्ह्यातील श्री खंडेश्वर सार्वजनिक गणेश मंडळास तर द्वितीय सांगली जिल्ह्यातील विटा येथील तिरंगा गणेशोत्सव मंडळास जाहीर
सांस्कृतिक कार्य मंत्री सुधीर मुनगंटीवार यांच्या हस्ते गुरुवारी पारितोषिक वितरण
मुंबई दि.११ (प्रतिनिधी) - राज्य शासनाच्या सांस्कृतिक कार्य विभाग आणि पु. ल. देशपांडे महाराष्ट्र कला अकादमीच्यावतीने घेण्यात आलेल्या उत्कृष्ट सार्वजनिक गणेशोत्सव मंडळ स्पर्धा - २०२३ चा निकाल घोषित करण्यात आला आहे. राज्यस्तरीय प्रथम पुरस्कार श्री खडकेश्वर सार्वजनिक गणेशोत्सव मंडळ, पातूर, जिल्हा अकोला यांना द्वितीय पुरस्कार तिरंगा गणेशोत्सव मंडळ, यशवंतराव, विटा, ता. खानापूर, जि. सांगली यांना तर आणि तृतीय पुरस्कार मार्केट यार्ड मित्र मंडळ, मंचर, ता. आंबेगाव, जि. पुणे यांना जाहीर झाला आहे. राज्यातील पहिल्या क्रमांकाच्या उत्कृष्ट गणेशोत्सव मंडळास रुपये ५ लाख, व्दितीय क्रमांकास रुपये २ लाख ५० हजार आणि तृतीय क्रमांकास रुपये १ लाख इतक्या रकमेचे पारितोषिक, सन्मानचिन्ह व प्रमाणपत्र देऊन गौरविण्यात येणार आहे. याशिवाय ३६ जिल्ह्यांसाठीही जिल्हानिहाय पारितोषिक विजेते जाहीर करण्यात आले आहेत. जिल्हास्तरीय पारितोषिकाचे स्वरूप प्रत्येकी रुपये २५ हजार रुपये, सन्मानचिन्ह व प्रमाणपत्र असे आहे. जिल्हास्तरीय निकाल सोबत जोडला आहे.
या स्पर्धेचा पारितोषिक वितरण समारंभ राज्याचे सांस्कृतिक कार्य मंत्री सुधीर मुनगंटीवार यांच्या हस्ते गुरुवार, दिनांक १२ ऑक्टोबर रोजी करण्यात येणार आहे. रवींद्र नाट्य मंदिर, प्रभादेवी येथे दुपारी ४ वाजता हा पारितोषिक समारंभ होणार असून शालेय शिक्षण मंत्री तथा मुंबई शहर जिल्ह्याचे पालकमंत्री दीपक केसरकर, खासदार राहुल शेवाळे आणि आमदार सदा सरवणकर यांची प्रमुख उपस्थिती राहणार आहे. यावेळी भैरी भवानी परफॉर्मिग आर्टस् यांचे सादरीकरण असलेला "गणराज रंगी नाचतो" हा सांस्कृतिक कार्यक्रमही होणार आहे. या कार्यक्रमास उपस्थित राहण्याचे आवाहन मुख्यमंत्र्यांचे प्रधान सचिव तथा सांस्कृतिक कार्य विभागाचे प्रधान सचिव विकास खारगे यांनी केले आहे.
